Smokkfiskssamloka

Ég er ekki mikið fyrir smokkfisk, aðallega því mér finnst ég oft fá seiga bita og það er fátt leiðinlegra en að borða mat sem þarf að tyggja endalaust.

En kærastanum finnst smokkfiskur mjög góður og því ákvað ég í tilefni af afmælisdegi hans að elda eitthvað úr smokkfisk.

Ég rakst á uppskrift í blaði sem var tileinkað samlokum og þar á meðal var smokkfisks samloka sem hljómaði mjög spennandi.  Ég hafði hana til hliðsjónar þegar ég bjó til þessa, sem var rosalega góð og ekkert ólseigt við smokkfiskinn að þessu sinni.

Galdurinn hér er ferskt fennel og slatti af fersku basil og kóríander ásamt alvöru mæjónesi, ég nota eiginlega aldrei mæjónes, en það var rosa gott hér og ég mæli með því.

Smokkfiskssamloka (fyrir 2)

• Gott baguette eða annað samlokubrauð (ciabatta t.d)
• 1/2 bolli mæjónes
• 1-2 msk Sriracha hot sauce
• 1 tsk mulinn þurrkaður chili
• 1 msk matarolía og slatta í viðbót til að djúpsteikja úr
• 2-3 rif hvítlaukur
• 1/2 græn paprika
• 2 smokkfiskar (1 pakki)
• Bjórdeig (1 dl hveiti og slatta af bjór)
• 1 góður vöndur af  fersku basil
• Slatta af fersku kóríander
• Agúrka, skorin langsum í þunna strimla
• 1/4 fennel, skorið í þunnar sneiðar langsum
• 1 lime
• Salt og pipar

Dágóður hráefnislisti, en ekki svo flókin eldamennska.

Sósan:Hrærir saman mæjó, sriracha sósu og chiliflögunum.  Setjið í kæli.

Hitið olíu á pönnu, 1 msk eða svo og mýkið papriku sem þið hafið skorið í þunna strimla og svitið hvítlauk. (Hér mætti setja út í 1 msk af fiskisósu, en ég gerði það reyndar ekki).  Takið pönnuna af hellunni og setjið til hliðar.

Hitið olíu í potti til djúpsteikingar

Bjórdeig:Setjið dl af hveiti í skál og hellið saman við bjór þar til þið eruð komin með deig sem svipar til vöffludeigs.  Skerið smokkfiskinn í sneiðar svo úr verða hringir.  Dýfið honum í bjórdeigið og djúpsteikið. Það fer eftir hita olíunnar og svona hversu lengi þið þurfið að steikja fiskinn, en ég miðaði við þar til deigið var gullinbrúnt, eða um eina mínútu kannski ein og hálf.

Takið smokkfiskinn úr olíunni og setjið á disk með eldhúspappír.

Ég skellti mínu baguette í panini grillið.  Svo smyr ég smá mæjósósu á báða helminga brauðsins, skelli þar ofan á paprikunni, fennel, agúrku, kóríander og basil. Toppa þetta með djúpsteikta smokkfisknum. Lime sker ég í þunna litla bita og dreifi þeim ofan á fiskinn. Restina af lime skar ég í báta og bar fram með samlokunni.  Saltið og piprið eftir smekk.

Sriracha sósan er sterk chili sósa, ég veit ekki hvort hún fæst hér, en að væri á helst í asísku búðunum. Mér finnst nú samt eins og ég hafi séð hana einhversstaðar, þetta er svo vinsæl sósa.  Í staðin fyrir þessa sósu væri hægt að nota einhverja chilisósu, en þó ekki súrsæta.  Og jafnvel smá dropa af tabaskó ef þið eruð ekki með sterka chilisósu.

Morgunverðarbollur

Kostir og gallar þess að búa í sveit.  Þegar manni langar í rauðvín og beljan sem maður keypti smakkast skemmd þá er lítið annað en að gera en að fá sér te eða…

Það væri reyndar hægt að fara yfir á næsta bæ í kurteisisheimsókn, t.d með nýbakað brauð og vonast til að heimilisfólkið bjóði manni upp á eitt glas.  Ég held ég geri það og á meðan getið þið lesið uppskriftina af þessum auðveldu og bragðgóðu morgunverðarbollum.

Morgunverðarbollur

Fátt betra en nýbakaðar bollur í morgunsárið, jah eða um hádegisbil…

Þessi uppskrift býr til um 16 bollur

• 2/3 bollar volgt vatn
• 2 bollar mjólk
• 5-6 msk smjör
• 2 tsk salt
• 1/2 bolli sykur
• 9 bollar hveiti 
• 5 msk þurrger
• 1 msk sykur í gerið og 1/2 bolli í mjólkina
• 3 egg

1 bolli er 2,4 dl

 
Lét gerið freyða með volgu vatninu og sykri.  Það tekur um 10 mínútur. Það er mikilvægt að gerið freyði vel.  Þess vegna setjum við sykur út í en alls ekki salt.
Hitaði í potti mjólk, smjör, sykur og salt þar til smjörið bráðnaði.  Kælið þar til blandan verður volg (svo hún drepi ekki gerið).
Setjið mjólkurblöndu og 3 bolla af hveiti í hrærivél og hrærið í 30 sek.  Blandið gerinu saman við.  Svo 3 pískuðum eggjum og að lokum restina af hveitinu, eins mikið og þið þurfið til að úr verið gott brauðdeig, eða um 5-6 bollar.  Hnoðið vel.

Setjið rakan klút yfir skálina og látið hefast í klst.

Hitið ofninn í um 190°c

Hnoðið deigið niður, mótið úr þessu bollur sem þið raðið í eldfast mót.  Leggið rakan klút yfir og leyfið bollunum að hefast í hálftíma.  Bakið í ofni í 15-20 mín.  Mínar bollur lágu þétt saman þannig að þær mynduðu brauð, en þó var auðvelt að slíta þær í sundur.

Ef ykkur langar í pizzu með brauðkenndum botni, takið þá frá part af deiginu, fletjið út og bakið með vel völdu áleggi þar sem ofninn er heitur og bollurnar að hefast.

Mexíkósk maíssnitta

Vinkona mín sagði um daginn: ” Afhverju eru íslendingar alltaf að bíða eftir sumrinu?” Ég er ein af þessum sem er alltaf að bíða eftir sumrinu og ALLTAF jafn hissa að sjá hagl í júní, ár eftir ár.

En þetta árið, nú er ég hætt að bíða eftir sumrinu, jah, eða frekar hætt að bíða eftir vorinu og undra mig ekkert á því að hafa séð eitthvað sem líkist snjókornum út um gluggann rétt áðan og hafi lent í brjáluðu hagli í gær.
Fyrir utan það að það er að nálgast miður júní og ég er ekki enn búin að setja niður kartöflur.

En á meðan kalt er í veðri iljar maður sér bara í eldhúsinu.

Nágrannarnir færðu mér sneið af ótrúlega góðri og hollri köku. Og fyrst þeir færðu okkur köku þá hljóp ég yfir síðar þann daginn með maís tortillu  því hún var svo rosalega góð.

 

Chile con carne á “homemade” maís tortillu með sýrðri sósu og spínati, öðru nafni:

Ekki gleyma “zestinu”

Byrjið á að búa til tortillu, helst með maís hveiti, sem ég hef því miður ekki séð hér heima. Þannig að hveiti virkar í staðinn fyrir maís hveitið.

Tortillur úr maís hveiti

• Maíshveiti
• vatn
• salt

Blandið saman hráefnum og hnoðið þar til degið helst saman, mótið úr því litlar kúlur á við golfbolta, fletjið kúlurnar út með því að setja þær á milli tveggja smjörpappírsblaða og þrýsta ofan á þær með t.d litlu skurðbretti.  Steikið upp úr olíu á pönnu á báðum hliðum.

Þetta er ekki mjög nákvæm uppskrift en ég set yfirleitt bara það magn af hveiti sem ég ætla að nota í skál með salti og bæti við vatni þar til þetta er orðið að deigi sem ég er ánægð með.

Búið til gott Chile con carne eða sin (con þýðir með en sin þýðir án, s.s chile með kjöti eða chile án kjöts sem er líka gott, hafa þá bara góðar baunir.

Sýrður með zesti

• Sýrður rjómi
• Nokkrar sneiðar af niðursoðnum jalapeno
• Svartar ólífur, sneiddar
• Lime, safi og rifinn börkur
• Salt

Setjið nokkrar msk af sýrðum rjóma í skál.  Bætið við fínt söxuðum jalapeno sneiðum, ólífum, salti
lime safa og rífið með fínu rifjárni börk af lime og blandið við.

Leggið spínat blöð ofan á tortilla kökuna, setjið skeið af chile con carne og ofan á það skeið af sýrða rjómanum.  Skreytið með graslauk.

Kanadískt og japanskt fjúsíon = KanPan

Ég var hálf andlaus í eldhúsinu og gat ekki tekið ákvörðun um hvað mig langaði að elda.
Það var til spínat og nautahakk, það voru svona hráefni sem ég ætlaði að nota.
Ég bað kærastann um að nefna tvö lönd og svo myndi ég elda eitthvað út frá því í anda þessara tveggja landa og “fjúsíona” þeim saman í einn rétt.

Ég hélt að það myndi auðvelda mér lífið og var eiginlega búin að sjá fyrir mér að hann segði Ítalía og Grikkland eða eitthvað álíka.  En nei, hann valdi Kanada og Japan.

Þetta var ekki beint að auðvelda mér matreiðsluna, en þetta var skemmtileg áskorun og hugurinn fór á flug.

Í fyrsta lagi, KANADA, hver í ósköpunum er samnefnari kanadískrar eldamennsku.
Reynslan sem ég hef er pöbbamatur, allt djúpsteikt, hamborgarar, beef dip samlokur sem er roastbeef samloka sem þú dýfir í einhverskonar soð.
Ég ætla að tileinka annarri færslu þeirri uppskrift fljótlega, það er alveg komin tími á Beef dip!
En ég er að miða við því sem ég kynntist þegar ég bjó í litlum indíána og kúreka bæ sem heitir Kamloops. Það eru allt aðrir straumar í t.d Vancouver og ég tala nú ekki um ef þú ferð til Halifax, Kanada er stórt land með mikið af fólki, og íbúarnir eiga ættir sínar að rekja til ýmissa landa, til dæmis víða frá Asíu, Úkraínu og Rússlandi, Íslandi auðvitað, Bretlandi og svo mætti lengi telja.

Maple sýróp er stór útflutningsvara Kanada.  Ég lumaði á flösku og það var ekki spurning að ég ætlaði að nota það í þennan rétt.

Svo má ekki gleyma indíánum, þeim sem hafa búið þarna hvað lengst. Þeirra matarmenning er áhugaverð. En ég ákvað að fara ekki út á þá stefnu að þessu sinni. Heldur tók ég pöbbamatinn á þetta með Vancouver yfirbragði.

JAPAN.  Fyrsta sem mörgum dettur i hug er sushi. Það var það sem ég hugsaði. Ég leit í hillur og skápa og skoðaði hvaða hráefni ég ætti sem tengdust japanskri matargerð.
Ég fann sesame fræ, engifer og soya sósu.

Og án þess að ofhugsa dæmið þá dembdi ég mér í matargerð

KanPan ( 4 snittur)

100 g nautahakk
1-2 rif hvítlaukur
1-2 cm bútur engifer
1-2 tsk Soya sósa
Lúka af sesamfræjum
Baguette, 4 sneiðar (ég notaði ítalskt ólífu baguette frá Mosfellsbakarí)
Salt
Pipar
Spínat, 4 lauf
3-4 msk rifinn ostur (ég notaði brauðost því ekkert annað var til)

Sósan
Sýrður rjómi, 2 msk
Maple sýróp, 1 msk
Salt, ca 1-2 tsk

Blandið saman í skál nautahakki, sesamfræjum, soyasósu, rifnum hvítlauk og rifnum engifer.  Ég notaði grófari hliðina á rifjárninu til að rífa hvítlaukinn og engifer.
Saltið og piprið.  Mótið úr þessu 4 litla hamborgara, í stærð sem passar ofan á snittubrauð.

Steikið hamborgarana upp úr smá olíu.

Sósan:  Blandið saman sýrðum, sýrópi og salti, hrærið vel saman.

Hitið baguette sneiðarnar á pönnunni sem þið steiktuð hamborgarana. Setjið ostinn ofan á aðra hliðina
á brauðinu á meðan þið steikið hina til að hann bráðni aðeins.

Setjið spínatlauf ofan á brauðið og svo borgarann.  Dreifið úr smá sósu ofan á borgarann.  Borðið strax á meðan þetta er heitt og gott.

Mér hefði aldrei dottið í hug að setja soya í nautahakk, en það svínvirkar!  Þetta er það skemmtilega við svona áskoranir, maður prófar nýja hluti.

jalapeño, vorlaukur, hvítlaukur og tortilla í frystinum

Ekki mikið til og þegar ég er svöng og langar í allt og veit ekkert hvað ég á að fá mér þá endar það oft á því að ég skelli því sem til er á tortillu sem ég á yfirleitt í frysti.  Bráðinn ostur og niðursoðinn jalapeño í dós er hin fullkomna samsetning.

Þegar þú átt…

…tortillu í frysti, taktu hana þá út úr frystinum

…ost, rífðu hann!

…jalapeño í krukku, skerðu hann smátt

…hvítlauk, saxaðu hann í sneiðar

…vorlauk, skerðu hann smátt

…góð krydd, náðu þér í það sem þér þykir gott, í mínu tilfelli sótti ég mér oregano, salt og grænan pipar.  Úr verður dýrindis réttur sem að þessu sinni lét mér duga sem kvöldmat.

Pizzabotn úr blómkáli og fjörugur föstudagur

Já, þið lásuð rétt.  Pizzabotn úr blómkáli.  Ég veit ekki hvernig ég á að byrja þessa færslu til að sannfæra ykkur að pizzabotn úr blómkáli er góður. Það kemur ekkert í staðin fyrir þunnan hveitibotninn finnst mér en þetta er skemmtileg tilbreyting og frábært fyrir þá sem forðast hveiti.

Setjum á tónlistina, Postal service.

Uppskrift vikunnar er áður óbirt uppskrift af þessum magnaða blómkálspizzabotni:

Galdurinn við þennan pizzabotn er að rífa blómkálið í matvinnsluvél, en ekki of lengi svo það verði ekki of blautt, heldur þannig að það verði svipað og hrísgrjón.

Blómkálspizzabotn

• 1 blómkál, rifið
• 2 dl rifinn ostur, mossarella eða brauðostur
• 1 egg, hrært
• Krydd (2 hvítlauksrif, salt, pipar, oregano)

Takið rifið blómkálið og bætið við 1 eggi, rifnum osti og því kryddi sem þið viljið.  Ég notaði pressaðan hvítlauk, 2 rif, salt og pipar og smá oregano. Blandið saman með höndum eða sleif.

Pressið blómkálsblöndunni með fingrunum á smjörpappír.  Bakið í ofni við 200° í u.þ.b 20 mínútur.

ATH, bakið botninn áður en þið setjið áleggið á, svo setjið þið hann aftur í ofninn með álegginu í nokkrar mínútur.

Takið botninn úr ofninum og bætið ofan á hann því áleggi sem þið viljið, sósu og osti…

Ég google-aði blómkálsbotna og fann á flestum síðum að fólk setur rifið blómkálið í örbylgjuofn í 8 mínútur áður en það blandar því við annað innihald og bakar, en ég las líka að það væri óþarfi.  Ég sleppti því reyndar því ég prófaði að setja smá í skál og í örbylgjuna en það var eflaust aðeins of lengi því það hálf brann.  Maður þarf víst bara að þreifa sig áfram í þeim efnum.  En mér fannst koma mjög vel út þrátt fyrir að hafa ekki eldað kálið áður.

Vín vikunnarer J. Lohr seven oaks, Cabernet Sauvignon, 2006 frá Bandaríkjunum.  Ekki ódýrasta vínið í búðinni og mjög gott.

Vefsíða vikunnar er http://www.foodbuzz.com/, þetta er einhverskonar “myspace” mataráhugamannsins.  Fullt af matarbloggurum, uppskriftum og fleiru matartengdu…

Uppskrift valin af handahófi úr uppskriftarsafninu mínu að þessu sinni er rétturinn Gridexian, sambland af grískum, indverskum og mexíkönskum…góð blanda og réttur sem smakkaðist mjög vel.

Mynd vikunnarer mynd sem ég tók á síðasta ári af frægasta “Emo” hesti landsins…

Pizza með dijon sinnepi, fetaosti, ólífum og hvítlauk

Það er gaman í sveitinni. Sérstaklega þegar kemur að því að borða með nágrönnunum.

Þá þarf ekki að hafa mörg orð um hvað verður á boðstólnum, heldur töfrum við húsmæðurnar fram hverja stórmáltíðina á fætur annarri, þegjandi og hljóðalaust. Það sem til er í ísskápnum er notað og spunnið út frá því.

Ef þið eigið kjúklingaleggi þá mæli ég með því að þið setjið þá í eldfast fat með döðlum, kapers, ólífum, balsamikediki og hunangi, smá hvítlauk, salti og pipar.

Ef ykkur langar í öðruvísi pizzu þá sló þessi í gegn:

• Pizzabotn, þunnt útflattur
• Ólífur
• Hvítlaukur, skorinn í skífur
• Fetaostur í kryddolíu
• Dijon sinnep
• Salt og pipar

Smyrjið smá sinnepi á pizzabotninn, raðið álegginu á, saltið og piprið. Bakið í ofni þar til botninn er bakaður.

Ég hef sérstaklega gaman að ílöngum pizzum þessa dagana og skera þær í þunnar ræmur og renna þeim niður með rauðvínstári og nágrannaspjalli.

Skemmtileg aðferð við að bera fram spaghetti og pulsur, mjög einfalt og fljótlegt

Þessi aðferð brýtur aðeins upp á hversdagsleikann þegar spaghetti er á boðstólnum.

Ég er viss um að krakkarnir hefðu gaman að þessu.  Þetta er heimilislega útgáfan en það mætti færa þessa hugmynd í sparilegri búning með góðri pulsu og bera fram sem forrétt. Mun þreyfa mig áfram í þeim efnum síðar.

Spaghetti með pulsu og tómatsósu

• Spaghetti
• Pulsur
• Tómatsósa

Skerið pulsurnar í 4 jafna parta (skerið frá endana).

Stingið ósoðnu spagettí í pulsurnar, 4-5 spaghetti í hverja pulsu.  Sjóðið þar til spaghettíið er soðið.  Berið fram með tómatsósu eða góðri spaghettisósu.

Holla útgáfan gæti verið heilhveiti spaghetti og fitulitlar kjúklingapulsur.

Föstudagsfjör á ansi stormasömum föstudegi

Föstudagur heima í firðinum góða, kenndan við Hval.  Nágrannar okkar í næsta húsi voru einnig heima í dag og því var slegið til veislu og borðaður saman síðbúinn hádegisverður með rauðvínstári.  Ég keypti tómata í gær, græna, gula og svarta.  Þannig að úr varð tómatapizza með mossarella.

Vindum okkur í fjörið.

Tónlistin:Ég kann alltaf vel við hana Feist, og þetta lag kemur mér alveg í gírinn.

Uppskrift vikunnar: Þær voru nú ekki margar þessa vikuna en ég get alveg mælt með konfektinu, með eða án marsípans.

Vínið: Beronia vínin hafa sjaldan svikið mig, ég mæli sérstaklega með gran reserva, en crianzan stendur líka alveg fyrir sínu.

Uppskriftin sem valin var að handahófi þessa vikuna er grísalund með mojo marineringu.  Það er ekki verra að bera hana fram með í samloku að hætti Kúbubúa
Vefsíðan þessa vikuna er epicurius.com. Ég tala nú ekki um appið sem þeir eru með fyrir Android síma.  Ég setti það í símann minn og nota það óspart, óteljandi uppskriftir til að fletta upp í.

Mynd vikunnar er af þessum fallegu tómötum, en það er ekki á hverjum degi sem maður dettur niður á jafn fjölbreytt úrval af tómötum.

Ofurmæður sem elda, baka, sauma og föndra og allt hitt

Internetið er stútfullt af amerískum ofurmömmum.  Margar eiga það sameiginlegt að vera sannkristnar heimavinnandi húsmæður, yfirleitt með 3-5 börn og það mæðir ekki á biturleika hjá þessum konum, enda hvernig ættu þær að hafa tíma fyrir það miðað við allt sem þær dúlla sér við og blogga svo um. 

Það er ekki nóg með að þær elda dýrindis máltíðir, baka kökur sem orð fá ekki lýst, þá sauma þær svuntur og kjóla og föndra eins og vindurinn.  

Hér er ein og nú kvóta ég:

“In my downtime I also enjoy crafting, sewing, knitting, baking, cooking, decorating and even doing the laundry…”  Já, meir að segja hefur hún gaman að þvotti!   Ef þið viljið kynnast þessari betur þá er hún með ágætis síðu um saumaskap, föndur og uppskriftir

smashedpeasandcarrots

Ég lét reyna á mína ofur húsmæðratakta í kvöld, skipti á rúminu, henti í léttan dinner og fyrir matinn bjó ég til tvenns konar konfekt, annað fyrir litla munna og hitt aðeins sætara, en þar notaði ég marsípan.

Fyrst gerði ég þetta klassíska, döðlur, kókós og fleira maukað í spað í matvinnsluvél.  Svo tók ég frá part af því og bætti við marsípan út í það sem eftir var í matvinnsluvélinni.

Konfekt

• 2 dl döðlur
• 2 dl kókós
• 1 dl heslihnetur
• 1/2 dl haframjöl
• 2 tsk kakó
• 2 tsk sýróp
• 3 msk vatn ef þetta er ekki nógu blautt

—

Og í næsta skammt

• Hálf uppskrift hér að ofan
• 100 – 200 g marsípan eða bara eftir smekk og stemmningu

Ég bjó til kúlur úr massanum og  rúllaði ég svo konfektkúlunum annarsvegar upp úr kakódufti og hinsvegar upp úr kókós.

Það má mauka svo margt við þetta, alls konar þurrkaða ávexti, fræ og hnetur.